Националниот младински совет на Македонија ја поздравува одлуката на Министерството за социјална политика, демографија и млади да го продолжи рокот за аплицирање на Јавниот повик за финансиска поддршка на здруженија и фондации. Овој чекор претставува позитивен сигнал дека гласот на младинските организации е слушнат и земен предвид и дека институциите можат да дејствуваат одговорно.

Истовремено, НМСМ верува дека овој случај треба да биде поттик за воспоставување на суштинска, континуирана и структурирана соработка помеѓу Министерството и младинскиот сектор. Ваквиот дијалог е клучен за планирање на транспарентни, инклузивни и навремени процеси кои ќе обезбедат еднаков пристап и младински политики кои соодветствуваат на реалните потреби на младите.

Продолжувањето на рокот е чекор во вистинската насока, но долгорочните решенија бараат повеќе од технички корекции – тие бараат вклучување на младинските организации како рамноправни партнери во процесите на креирање, спроведување и евалуација на политиките и програмите што ги засегаат младите. Не е прифатливо младите и младинските организации да се вклучуваат само по реакција и под притисок – нивната улога мора да биде системска и обезбедена уште од самиот почеток на секој процес за да се обезбеди суштинско, наместо токенистичко вклучување.

НМСМ останува посветен на конструктивен дијалог со институциите и ќе продолжи да се залага за младински политики засновани на партнерство, отчетност и визија за општество во кое младите се активни чинители. Своето знаење, експертиза и долгогодишно искуство, НМСМ го става на располагање на секоја институција што  ја дели нашата визија.